Sharwashılıqta sanitariyalıq-epidemiologiyalıq gigiena aylıǵı sheńberinde keń kólemli ilajlar ámelge asırılmaqta.

Usı jıldıń 18-aprelinen 18-mayına shekem mámleketimizde “Sharwashılıqta sanitariyalıq-epidemiologiyalıq gigiena” aylıǵı járiyalanǵan.

Usı aylıq sheńberinde Qaraqalpaqstan Respublikası Veterinariya hám sharwashılıqtı rawajlandırıw komitetiniń qala hám rayonlardaǵı bólimleri tárepinen keń kólemli profilaktikalıq ilajlar ámelge asırılmaqta.

Atap aytqanda, úy haywanların qutırıw keselligine qarsı, sharwa malların bolsa “awsıl” keselligine qarsı shanshıw jumısları alıp barılmaqta. Bul ilajlar aldınnan tastıyıqlanǵan grafik tiykarında shólkemlestirilip, barlıq aymaqlardaǵı shańaraqlar hám sharwashılıq subyektlerin tolıq qamtıp alıwǵa ayrıqsha itibar qaratılmaqta.

Sonıń menen birge, sharwa malları saqlanatuǵın orınlarda hám sharwa malları satılatuǵın bazarlarda sanitariyalıq jaǵdaydı jaqsılaw maqsetinde turaqlı túrde dezinfekciya hám dezinsekciya jumısları alıp barılmaqta. Bul processler kesellik qozdırıwshı faktorlardı saplastırıw, juqpalı kesellikler tarqalıwınıń aldın alıw hám sharwa malları ushın salamat ortalıq jaratıwda úlken áhmiyetke iye.

Emlew, dezinfekciya hám dezinsekciya ilajları qánigeler tárepinen zamanagóy veterinariya talapları, sanitariyalıq-gigienalıq normalar hám qáwipsizlik qaǵıydalarına qatań ámel etken halda ámelge asırılmaqta.

Nátiyjede haywanlar arasında juqpalı keselliklerdiń tarqalıwınıń aldı alınıp, epizootiyalıq turaqlılıq támiyinlenbekte. Bul bolsa, óz gezeginde, xalıqtıń salamatlıǵın qorǵaw hám azıq-awqat qáwipsizligin bekkemlewge xızmet etpekte.