Qayta islengen sút ónimlerin qalaǵa jetkizip beriw imkaniyatları haqqında sóz júritildi

Ózbekstan Respublikası Veterinariya hám sharwashılıqtı rawajlandırıw mámleketlik komiteti baslıǵı Bahrom Norqobilov basshılıǵındaǵı veterinariya hám sharwashılıq tarawı qánigelerinen ibarat jumısshı topar Qaraqalpaqstanda bolıp turıptı.

Jumısshı topar Nókis qalasındaǵı “Panamilk” sútti qayta islew kárxanasında bolıp, ondaǵı  shárt-shárayatlar menen jaqınnan tanıstı.

Kárxanaǵa altı júz bastan zıyat Evropa mámleketlerinen “golshteyn” hám “simmental” tuqımınan násilli mallar keltirilgen. Búgingi kúnde olardan sawılǵan sút Italiya texnologiyası tiykarında qayta islenedi. Házirde kárxanada sır, yogurt, qaymaq, smetana, kefir sıyaqlı jigirma bes túrli sút ónimleri islep shıǵarılıp atır. Búgingi kúnde kárxana Nókis qalasın qayta islengen sút ónimleri menen támiyinlewde joqarı kórsetkishke iye tur.

Bahrom Norqobilov kárxana texnologlari menen baylanısi dawamında islep shıǵarılıp atırǵan sút ónimleri sapası hám kólemin jáne de asırıw zárúrligi, ónimlerdi basqa rayon hám qalalarǵa usılar qatarı Tashkentdegi sawda shaqapshalarına shekem jetkiziw múmkinshilikleri jóninde usınısların bildirdi.

Kárxana iskerligin jáne de rawajlandırıw, sonıń menen birge qosımsha investittsiyalar tartıw boyınsha joybarlar analiz etildi.