Qıtay hám Oraylıq Aziya siyasiy partiyalarınıń úshinshi forumı

Qıtay hám Oraylıq Aziya mámleketleri siyasiy partiyalarınıń «Ózine tán ózgesheliklerinen kelip shıqqan halda rawajlanıw jolınan isenimli barıw: siyasiy partiyalardıń wazıypası hám juwapkershiligi» atamasındaǵı úshinshi forum videokonferencbaylanıs tárizinde ótkerildi.

Bul konferenciya usı jılı 25-yanvar kúni diplomatiyalıq qatnasıqlar ornatılǵanınıń 30 jıllıǵına baǵıshlanıp shólkemlestirilgen Oraylıq Aziya hám Qıtay mámleketi basshılarınıń videokonferenciya tárizindegi ushırasıwda erisilgen kelisimge muwapıq shólkemlestirildi.

Ilajda Qıtay Kommunistlik partiyası, Oraylıq Aziya mámleketleriniń parlamentleri hám siyasiy partiyalarınan 60 qa shamalas delegat qatnastı.

Atap ótilgenindey, sońǵı jıllarda Qıtay hám Oraylıq Aziya mámleketleriniń birge islesiwi jańa basqıshqa kóterildi. Atap aytqanda, parlamentleraralıq hám siyasiy partiyalar arasındaǵı baylanıslar jedel tús almaqta, hár tárepleme strategiyalıq sheriklik bunnan bılay da bekkemlenbekte.

Forumda Oraylıq Aziya mámleketleri hám QXR arasındaǵı 30 jıllıq birge islesiw nátiyjelerine, Prezident Shavkat Mirziyoev tárepinen alǵa qoyılǵan regionallıq baslamalarǵa ayrıqsha itibar qaratıldı. Kóp qırlı birge islesiwge baylanıslı áhmiyetli máseleler, perspektivadaǵı tiykarǵı baǵdarlar boyınsha pikir alısıldı.

Ózbekstan Respublikası Oliy Majlisi Nızamshılıq palatası Spikeriniń birinshi orınbasarı Akmal Saidov mámleketimizdiń Qıtay hám Oraylıq Aziya mámleketleri menen kóp tárepleme strategiyalıq qatnasıqlar, atap aytqanda, parlamentleraralıq baylanıslar izbe-iz rawajlanıp atırǵanın atap ótti. Konferenciyada elimizdegi bes siyasiy partiya wákilleri de qatnasıp, bayanat jasadı.

Qatnasıwshılardıń pikirinshe, bul forum dúnya júziniń kópshilik bólegin iyelegen mámleketler arasındaǵı siyasiy, ekonomikalıq, huqıqıy, ruwxıy-aǵartıwshılıq baylanıslardıń rawajlanıwın jańa basqıshqa kóteredi. Sonıń ishinde, parlamentlerdiń jumısında nızam dóretiwshiligin jetilistiriwge xızmet etedi, hújjetlerdi ele de tolıq islep shıǵıw imkaniyatın keńeytedi, partiyalararalıq baylanıslardı jańa basqıshqa alıp shıǵadı. Siyasiy partiyalardıń óz-ara tikkeley sóylesiwge kirisiw mexanizmin qáliplestiriwge járdem beredi.

Onlayn ushırasıwda Oraylıq Aziya hám Qıtay xalıqların jáne de jaqınlastırıw, mádeniy-gumanitarlıq almasıwdı keńeytiw máselesine ayrıqsha itibar qaratıldı.

Forum juwmaǵında tárepler ushın áhmiyetli bolǵan máselelerge baylanıslı ulıwma kózqaraslar hám usınıslar bildirildi.

Uluǵbek MAHMIRZAEV,

ÓzAnıń xabarshısı