Avtomobil jollarında insan qáwipsizligin isenimli támiyinlew hám ólimshilik jaǵdayların keskin azaytıw ilajları haqqında

Ózbekstan Respublikası Prezidentiniń qararı

Mámleketimizde keyingi jıllarda jol háreketi qáwipsizligin támiyinlew sistemasın jetilistiriw tarawında keń kólemli shólkemlestiriwshilik-ámeliy jumıslar ámelge asırıldı.

Sonıń menen birge, kórilip atırǵan ilajlarǵa qaramastan, ólimge alıp kelgen jol-transport hádiyseleriniń sanı ele de joqarı bolıp, avtomobil jollarında qáwipsizlikti támiyinlew sistemasın túp-tiykarınan reformalaw zárúr ekenin kórsetpekte.

Sonıń ishinde, jol infrastrukturasın háreket qáwipsizligin támiyinlewdiń zamanagóy talaplarına tolıq muwapıqlastırıw, usı tarawdaǵı qaǵıyda buzıwshılıqlardıń erte profilaktikasına baǵdarlanǵan nátiyjeli sistemanı jolǵa qoyıw, sonday-aq, insan faktorına burınǵısınan basqasha tárizde sanlı texnologiyalardı keńnen engiziw talap etilmekte.

2022-2025-jıllarda Ózbekstan Respublikasında jámiyetlik qáwipsizlikti támiyinlew sistemasın rawajlandırıw strategiyasına muwapıq, sonday-aq, Jańa Ózbekstan sharayatında avtomobil jollarında insannıń ómiri hám densawlıǵın hár qanday hádiyselerden kepillikli qorǵaw maqsetinde:

1. Tómendegiler mámleketimizde jol háreketi qáwipsizligin támiyinlewdiń áhmiyetli baǵdarları etip belgilensin:

avtomobil jolları infrastrukturasın jetilistiriw hám olardıń sapasın jaqsılaw, jol háreketi qatnasıwshılarınıń «piyada – jámiyetlik transport – velotransport – avtotransport» ústinligi tiykarında qáwipsiz háreketleniwi ushın isenimli sharayatlar jaratıw;

aydawshılardı tayarlaw, qayta tayarlaw hám olardıń mamanlıǵın arttırıw sistemasına innovaciyalıq pedagogikalıq texnologiyalardı engizgen halda, oqıw procesin sapa jaǵınan jańa basqıshǵa alıp shıǵıw;

aydawshı hám piyadalardıń jol háreketi qaǵıydalarına ámel etiw mádeniyatın arttırıw, hár qanday qaǵıydanı buzıw ushın jaza tayınlanıwın támiyinlew;

jol háreketi qaǵıydaları tiykarların bala waqtınan sińdiriwdi jolǵa qoyıw, bul ámeliyattı mektepke shekemgi bilimlendiriw shólkemleri hám ulıwma bilim beriw mekteplerinde engiziw;

jol háreketin shólkemlestiriwdi tolıq sanlastırıw, aldınǵı málimleme-kommunikaciya texnologiyaların engizgen halda, jańa basqarıw hám qadaǵalaw sistemaların engiziw.

2. Jol háreketi qaǵıydalarına sózsiz ámel etiliwin támiyinlew hám olardı qaytadan buzıw jaǵdaylarınıń aldın alıw maqsetinde 2022-jıl 1-dekabrden baslap tómendegi tártipti názerde tutatuǵın aydawshılarǵa jol háreketi qaǵıydasın buzǵanı ushın járiyma balların esaplaw sisteması engizilsin:

hár bir jol háreketi qaǵıydasın buzǵanı ushın 12 ay dawamında óz aldına járiyma balları esaplap barıladı;

esaplanǵan járiyma balları belgilengen muǵdardan artqan jaǵdaylarda aydawshı belgili bir múddetke transport quralın basqarıw huqıqınan ornatılǵan tártipte ayırıladı;

belgili dáwir dawamında jol háreketi qaǵıydasın buzbaǵan aydawshılarǵa keyin ala esaplanǵan járiyma balların qısqartıw arqalı xoshametlew ilajları qollanıladı.

Ishki isler ministrligi (P.R.Bobojonov), Ádillik ministrligi (R.Q.Davletov) bir ay múddette aldınǵı tájiriybeni esapǵa alǵan halda, aydawshılarǵa jol háreketi qaǵıydasın buzǵanı ushın járiyma balların esaplaw sistemasın engiziwdi názerde tutatuǵın nızamshılıq hújjetleri joybarların kirgizsin.

3. Aydawshılardı tayarlaw sistemasın túp-tiykarınan jetilistiriw hám sapa jaǵınan jańa basqıshqa alıp shıǵıw maqsetinde sonday tártip ornatılsın, oǵan muwapıq:

shólkemlestiriwshilik-huqıqıy túrine qaramastan, aydawshılardı tayarlaw, qayta tayarlaw hám olardıń mamanlıǵın arttırıw jumısın ámelge asıratuǵın barlıq bilimlendiriw mákemeleri (keyingi orınlarda – avtomektepler) imtixan oraylarına jumıstı ámelge asırıw ushın licenziya Ishki isler ministrligi tárepinen beriledi;

avtomekteplerdiń innovaciyalıq pedagogikalıq texnologiyalarǵa tiykarlanǵan oqıw baǵdarlamaların islep shıǵıw, sonday-aq, olardıń oqıtıwshı, aydawshı-instruktor hám muǵallimlerdi shártnama tiykarında qayta tayarlaw hám mamanlıǵın arttırıw jumısları Ishki isler ministrligi Akademiyası tárepinen ámelge asırıladı.

Ishki isler ministrligi (A.I.Ikramov, B.T.Abdullaev):

bir ay múddette avtomektepler hám imtixan oraylarına qoyılatuǵın talap hám normalardı qayta kórip shıǵıp, olardıń oqıw jumısınıń sapasın arttırıwǵa qaratılǵan qatań ilajlardı názerde tutatuǵın Húkimet qararı joybarın kirgizsin;

eki ay múddette Ishki isler ministrligi Akademiyasında avtomekteplerdiń muǵallimi, aydawshı-instruktor hám muǵallimlerdi qayta tayarlaw hám mamanlıǵın arttırıw kursların shólkemlestiriwge baylanıslı barlıq zárúr oqıw-metodikalıq hám materiallıq-texnikalıq bazasın jaratsın.

Ishki isler ministri P.R.Bobojonovqa avtomektepler hám imtixan oraylarınıń jumısı boyınsha jańadan engizilip atırǵan sistemanı nátiyjeli jolǵa qoyıw hám aydawshılardı sapalı tayarlawdı shólkemlestiriw boyınsha jeke juwapkershilik júklensin.

4. a) Nókis hám Tashkent qalaları, wálayatlardıń oraylarında kesilispelerdi tolıq sanlı basqarıw sistemasına ótkeriw boyınsha jeke juwapkershilik Qaraqalpaqstan Respublikası Ministrler Keńesiniń baslıǵı, Tashkent qalası hám wálayatlardıń hákimlerine júklenetuǵını;
5. b) Nókis hám Tashkent qalaları, wálayatlar, rayon (qala)lardıń oraylarında jol belgileri, kórsetkishleri hám svetoforlardı ornatıw, jol sızıqların sızıw, piyadalar ótiw orınların belgilew arqalı jol háreketi quralların tártipke salıwǵa ishki isler uyımları jol háreketi qáwipsizligi bólimleri (keyingi orınlarda – jol háreketi qáwipsizligi bólimleri) juwapker esaplanadı;
6. v) Qaraqalpaqstan Respublikası Ministrler Keńesi, Tashkent qalası hám wálayatlardıń hákimlikleri Málimleme texnologiyaları hám kommunikaciyaların rawajlandırıw ministrligi (Sh.X.Shermatov), Ishki isler ministrligi (P.R.Bobojonov) menen birgelikte eki ay múddette, sonıń ishinde, mámleketlik-jeke menshik sheriklik tiykarında investorlardı tartqan halda, kesilispelerde sanlı basqarıw sistemasın tómendegi dáwirlerde engiziw boyınsha shólkemlestiriwshilik ilajlardı belgileytuǵını:

2023-jıldıń aqırına shekem paytaxttıń barlıq kesilispelerinde, sonday-aq, Nókis qalası hám wálayatlar oraylarınıń iri tiykarǵı intensiv qatnaw kesilispelerinde;

2024-jıldıń aqırına shekem Nókis qalası hám wálayatlar oraylarınıń barlıq kesilispelerinde;

1. g) rayon (qala) hákimliklerine óz aymaqlarındaǵı avtomobil jollarında jol háreketi qaǵıylarınıń buzılıwın jazıp alatuǵın arnawlı avtomatlastırılǵan foto hám video programmalıq-texnikalıq qurallardı ornatıw huqıqı beriletuǵını. Bul programmalıq-texnikalıq qurallar arqalı jazıp alınǵan qaǵıyda buzıwshılıq ushın járiyma summasınıń 30 procenti tikkeley rayon (qala)lıq jergilikli byudjetke baǵdarlanatuǵını hám usı qarjılar jol háreketin sanlastırıw, jol infrastrukturasın rawajlandırıw, sonday-aq, jol-patrul xızmeti xızmetkerleriniń qosımsha shtatların kirgiziwge jumsalatuǵını belgilensin.

Ishki isler ministrligi (B.T.Abdullaev) Qaraqalpaqstan Respublikası Ministrler Keńesi, Tashkent qalası hám wálayatlar hákimlikleri menen birgelikte bir ay múddette transport hám piyadalar aǵımı, piyadalarǵa baylanıslı júz bergen jol-transport hádiyselerin tallaw tiykarında rayonlar hám qalalardaǵı xalqı tıǵız aymaqlarda piyadalar ótiw orınlarına piyadalar basqaratuǵın svetoforlardı 2023-jıldıń aqırına shekem ornatılıwın názerde tutatuǵın mánzilli baǵdarlamanı tastıyıqlasın hám orınlanıwın tolıq támiyinlesin.

5. Ishki isler ministrliginiń tómendegi usınısları maqullansın:

Qaraqalpaqstan Respublikası Ministrler Keńesi, wálayatlar hákimlikleriniń arnawlı ekspluataciyalaw-montajlaw bólimleri hám Tashkent qalası hákimliginiń Jol háreketin shólkemlestiriw orayın (keyingi orınlarda – ekspluataciyalaw-montajlaw bólimleri) eki ay múddette tiyislisinshe aymaqlıq ishki isler uyımlarınıń jol háreketi qáwipsizligi basqarmalarınıń janına ótkeriw;

ishki isler ministrine jol háreketi qáwipsizligi bólimlerine byudjetten tısqarı qarjılar esabınan maman sırt el qánigelerin másláhátshi sıpatında shártnama tiykarında tartıw huqıqın beriw;

«Uzavtomotobelgi» mámleketlik unitar kárxanasında jol háreketin shólkemlestiriwdiń texnikalıq quralların islep shıǵarıwdı jolǵa qoyıw hám usı tarawda báseki ortalıǵın qáliplestiriw;

Ishki isler ministrligi Jol háreketi qáwipsizligi xızmetiniń strukturasında Jol infrastrukturasın qadaǵalaw basqarmasın, aymaqlıq jol háreketi qáwipsizligi basqarmalarınıń strukturalarında jol infrastrukturasın qadaǵalaw bólimlerin ishki isler uyımlarınıń sheklengen shtat birlikleri esabınan shólkemlestiriw.

6. Qaraqalpaqstan Respublikası Ministrler Keńesi, Tashkent qalası hám wálayatlardıń hákimlikleri ekspluataciyalaw-montajlaw bólimlerin jol háreketi qáwipsizligi basqarmaları janına ótkeriwde:

ekspluataciyalaw-montajlaw bólimleriniń imarat hám obektlerin, olardıń tutas aymaqları, materiallıq-texnikalıq bazasın, sonıń ishinde, jańa zamanagóy arnawlı texnika menen támiyinlengen halda tapsırıw ilajların kórsin;

ekspluataciyalaw-montajlaw bólimleriniń kreditor hám debitorlıq qarızlarınıń tóleniwin, gónergen hám jaramsız jaǵdayǵa kelgen materiallıq-texnikalıq quralları esaptan shıǵarılıwın támiyinlesin.

Ishki isler ministrligi (B.T.Abdullaev):

eki ay múdette ekspluataciyalaw-montajlaw bólimleriniń jumısın tártipke salıwshı Húkimet qararı joybarın Ministrler Kabinetine kirgizsin;

ekspluataciyalaw-montajlaw bólimleriniń tiyisli imarat hám obektleri, olardıń tutas aymaqları, zárúr materiallıq-texnikalıq bazası menen támiyinlengen halda qabıl etiliwin shólkemlestirsin;

úsh ay múddette ekspluataciyalaw-montajlaw bólimleriniń jumısın sın kózqarastan qayta kórip shıǵıp, jol háreketin shólkemlestiriwdiń texnikalıq quralların tolıq ornatıw hám olardıń turaqlı jumıs islewin támiyinlew boyınsha jańa jumıs usılların engizsin.

Qarjı ministrligi (T.A.Ishmetov) bir ay múddette:

Ishki isler ministrligi menen birgelikte ekspluataciyalaw-montajlaw bólimleriniń baslıqları hám olardıń bir orınbasarı lawazımları usı bólimlerdiń shtat birlikleri esabınan oficerlik quramdaǵı xızmetker lawazımlarına ózgertiliwin támiyinlesin;

usı qararǵa muwapıq Qaraqalpaqstan Respublikası Ministrler Keńesi, Tashkent qalası hám wálayatlardıń hákimlikleri hám Ishki isler ministrliginiń qárejetler smetalarına tiyisli ózgerisler kirgizsin.

7. 2022-jıl 5-aprelden baslap Ishki isler ministrligi Jol háreketi qáwipsizligi xızmeti janında yuridikalıq tárep shólkemlestirmegen halda «Qáwipsiz jol hám qáwipsiz piyada» respublikalıq qorı (keyingi orınlarda – Qor) shólkemlestirilsin.

Tómendegiler Qordıń qarjıların qáliplestiriw dárekleri etip belgilensin:

1-qosımshaǵa muwapıq muǵdarlarda jol háreketin shólkemlestiriw tarawında óndiriletuǵın járiyma, alınatuǵın jıyım hám tólemler;

ekspluataciyalaw-montajlaw bólimleri ushın hár jılı byudjet parametrlerinde baǵdarlamalar tiykarında óz aldına ilajlar ushın názerde tutılatuǵın qarjılar;

Qordıń waqtınsha bos turǵan qarjıların kommerciyalıq banklerge depozit esap-betlerine jaylastırıwdan alınatuǵın dáramatlar;

mámleketlik, sırt el hám xalıqaralıq shólkemler tárepinen ajıratılatuǵın grantlar;

fizikalıq hám yuridikalıq táreplerdiń qáwenderlik hám qayırqomlıq tárizindegi qarjıları;

xalıqaralıq finans institutları hám bankler tárepinen ajıratılatuǵın kreditler;

nızamshılıq hújjetlerinde qadaǵan etilmegen basqa da dárekler.

Qordıń qarjıları tek ǵana tómendegiler ushın maqsetli jumsalatuǵını:

jol háreketin shólkemlestiriwdiń texnikalıq quralları, olardıń awısıq bólekleri, ornatıw ushın belgilengen konstrukciya hám qurılıs materialları hám arnawlı boyawlardı satıp alıw;

qalalar hám basqa da elatlı punktlerdiń kóshelerinde jol sızıqların sızıw, jol háreketin shólkemlestiriwdiń texnikalıq quralların ornatıw, almastırıw, saqlaw, demontajlaw hám olarǵa texnikalıq xızmet kórsetiwdi qarjılandırıw;

ekspluataciyalaw-montajlaw bólimleriniń materiallıq-texnikalıq bazasın bekkemlew, sonıń ishinde, zamanagóy arnawlı texnika quralları menen támiyinlew, olardıń jumıs kóleminen kelip shıqqan halda belgili múddetke qosımsha shtatlar kirgiziw, shártnamalar tiykarında qánigelerdi tartıw, olardıń xızmetkerleri, jumısshı hám xızmetkerleri ushın hár aylıq hám bir mártelik xoshametlew sistemasın engiziw;

jol háreketi qáwipsizligi tarawındaǵı aldınǵı sırt el tájiriybelerin úyreniw, jol infrastrukturasın rawajlandırıw baǵdarındaǵı joybarlardı qarjılandırıw;

mektepke shekemgi bilimlendiriw hám xalıq bilimlendiriw ministrliklerine qaraslı mektepke shekemgi bilimlendiriw shólkemleri hám ulıwma orta bilim beriw mákemeleriniń tárbiyalanıwshı hám oqıwshılarında jol háreketi qaǵıydaları boyınsha baslawısh bilimlerdi qáliplestiriwge qaratılǵan materiallıq-texnikalıq hám oqıw bazasın jaratıw, sonday-aq, máhállelerde balalarǵa jol háreketi qaǵıydaların ámeliy úyretiw maydanshalarına jol belgilerin ornatıw hám jol sızıqların sızıw ilajların qarjılandırıw.

8. Avtomobil jollarında háreketti shólkemlestiriw, basqarıw hám qáwipsizlikti támiyinlew tarawındaǵı jumıs nátiyjeliligin arttırıw maqsetinde Jol háreketi qáwipsizligin támiyinlew boyınsha respublikalıq arnawlı komissiyası hám onıń aymaqlıq arnawlı komissiyaları (keyingi orınlarda – arnawlı komissiyalar) 2 hám 3-qosımshalarǵa muwapıq dúzilsin.

Arnawlı komissiyalarǵa tómendegi tiykarǵı wazıypalar júklensin:

jol háreketi qáwipsizligi tarawında puqaralardıń ómirin hám densawlıǵın isenimli qorǵaw, jol infrastrukturasınıń qáwipsizlik talaplarına juwap beriwin támiyinlew;

aymaqlarda jol háreketin nátiyjeli shólkemlestiriw jaǵdayın turaqlı túrde bahalap barıw, bul tarawda mámleketlik uyımlar hám jergilikli hákimliklerdiń nátiyjeli jumıs alıp barıwın qadaǵalaw;

jol-transport hádiyseleriniń sebeplerin tereń úyreniw, jollardıń qáwipli avariyalar uchastkalarınıń dizimin tastıyıqlaw arqalı keleshekte olardıń aldın alıw boyınsha ilimiy tiykarlanǵan usınıslar tayarlaw sistemasın jaratıw;

jol háreketi qáwipsizligin támiyinlew tarawına zamanagóy málimleme texnologiyaların engiziw, insan faktorı hám korrupciya jaǵdayların burınǵısınan basqasha tárizde avtomatlastırılǵan qadaǵalaw sistemaların ǵalaba en jaydırıwǵa baylanıslı ilajlardı belgilew;

aymaqlarda jol infrastrukturasın jaqsılaw, jol-transport hádiyseleriniń sanın qısqartıw boyınsha baǵdarlamalar joybarlarınıń islep shıǵılıwın shólkemlestiriw hám kelisiw.

Jol háreketi qáwipsizligin támiyinlew boyınsha respublikalıq arnawlı komissiya haqqındaǵı rejesi 4-qosımshaǵa muwapıq tastıyıqlansın.

Respublikalıq arnawlı komissiya (A.N.Aripov):

Bir ay múddette Qaraqalpaqstan Respublikası Ministrler Keńesiniń Baslıǵı, Tashkent qalası hám wálayatlar hákimlikleriniń basshılıǵında aymaqlıq arnawlı komissiyalardıń úlgi rejesin tastıyıqlasın;

hár sherekte mámleketlik uyımlar hám jergilikli hákimlikler tárepinen jol háreketi qáwipsizligin támiyinlew tarawında ámelge asırılıp atırǵan jumıslardı, júzege kelgen kemshiliklerdi sın kóz qarastan dodalap barsın hám tiyisli sharalar kóriliwin támiyinlesin;

hár jılı jergilikli hákimliklerdiń óz aymaqlarında avtomobil jolları infrastrukturasın jetilistiriw hám jol-transport hádiyselerin keskin azaytıw boyınsha anıq mexanizmlerin názerde tutatuǵın mánzilli ilajların óz ishine alǵan «jol karta»ların tastıyıqlap, olardıń orınlanıwı ústinen qatań qadaǵalap barsın.

9. Sonday tártip ornatılsın, oǵan bola:

jol háreketi qáwipsizligi bólimleri arnawlı komissiyalardıń jumısshı uyımı esaplanadı;

jumısshı uyımlar turaqlı túrde tiyisli mámleketlik uyımlardıń jol háreketi qáwipsizligin támiyinlew boyınsha ámelge asırıp atırǵan jumısların talqılap baradı hám arnawlı komissiyalardıń májilislerinde dodalaw ushın hújjetlerdi tayarlaydı;

aymaqlıq arnawlı komissiyalar hár ayda jollardıń jaǵdayı hám infrastruktura, avariya oshaqları, qaǵıyda buzıwshılıqtı tallawdan kelip shıǵıp, háreket qáwipsizligi, transport hám jol tarawlarına juwapker uyımlardıń basshılarınıń jumısın sın kóz qarastan úyrenedi, Qaraqalpaqstan Respublikası Joqarǵı Keńesi, xalıq deputatları wálayatlar hám Tashkent qalası Keńeslerine dodalaw ushın  kirgiziledi hám nátiyjeleri boyınsha respublikalıq arnawlı komissiyaǵa esap beredi.

10. Aymaqlarda jol háreketin nátiyjeli shólkemlestiriw jaǵdayın bahalaw hám bul baǵdarda jergilikli hákimiyat uyımlarınıń juwapkershiligin kúsheytiw maqsetinde 2022-jıl 1-iyulden baslap, respublikanıń barlıq rayon (qala)ları kesiminde «Qáwipsiz jol» indeksin (keyingi orınlarda – indeks) júrgiziw ámeliyatı jolǵa qoyılsın.

indeks sheńberinde jol infrastrukturası hám jol háreketi qaǵıydalarına ámel etiwdiń jaǵdayı arnawlı komissiyalar tárepinen 5-qosımshaǵa muwapıq 29 indikator boyınsha hár sherektiń juwmaǵında bahalap barılatuǵını;

rayon (qala)lar indeks kórsetkishleri tiykarında jollarda háreket qáwipsizligin shólkemlestiriwdiń jaǵdayı boyınsha «jasıl», «sarı» hám  «qızıl» kategoriyalarǵa ajıratılatuǵını;

indeksti júrgiziw wazıypası jol háreketi qáwipsizligi bólimlerine júklenetuǵını belgilep qoyılsın.

Ministrler Kabineti (A.N.Aripov) eki ay múddette jetekshi ilimiy shólkemler, ilimpazlar hám qánigelerdi tartqan halda, indeksti júrgiziw metodologiyası islep shıǵılıwın hám tastıyıqlanıwın támiiynlesin.

11. Ishki isler ministrligi (P.R.Bobojanov) mápdar ministrlikler hám uyımlar menen birgelikte:
12. a) jol háreketi qáwipsizligin isenimli támiiynlew, jol-transport hádiyseleriniń erte aldın alıw maqsetinde «Ómir tezlikten áhmiyetli» hám «Qáwipsizlik belbewi – ómir girewi» súrenleri astında kompleksli úgit-násiyat jumısların shólkemlestirsin;
13. b) bir ay múddette tómendegilerdi názerde tutqan halda, oqıwshılar arasında jol háreketi qaǵıydaların úgit-násiyatlawdı kúsheytiwge qaratılǵan Húkimet qararınıń joybarın kirgizsin:

«Jol háreketi tártibi balalıqtan baslanadı»  súreni astında mektepke shekemgi bilimlendiriw mákemeleriniń tárbiyalanıwshıları hám mektep oqıwshılarına jollarda, kesilispelerde hám piyadalar ótiw orınlarında háreketleniw tiykarların ámeliy-kórgizbeli túrde úyretiw, olardıń sanasına balalıǵınan baslap jol háreketi intizamın sińdiriw;

mekteplerde «Háreket qáwipsizligi klassları»n, máhállelerde «Jol háreketin úyretiw maydanshaları»n shólkemlestiriw;

1. v) eki ay múddette nızamshılıq hújjetlerine usı qarardan kelip shıǵatuǵın ózgerisler menen qosımshalar haqqında Ministrler Kabinetine usınıslar kirgizsin.
2. Ózbekstan Respublikası Prezidentiniń hám Ózbekstan Respublikası Húkimetiniń ayırım qararlarına 6-qosımshaǵa muwapıq ózgerisler hám qosımshalar kirgizilsin.
3. Usı qarardıń orınlanıwın nátiyjeli shólkemlestiriwge juwapker hám jeke juwapker etip ishki isler ministri P.R.Bobojonov, Qaraqalpaqstan Respublikası Ministrler Keńesiniń Baslıǵı, Tashkent qalası hám wálayatlardıń hákimleri belgilensin.

Qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi B.D.Islamovqa júklensin.

Ózbekstan Respublikası

Prezidenti     Sh.MIRZIYOEV

Tashkent qalası,

2022-jıl 4-aprel