Sharwashılıq tarawında sanitariyalıq hám profilaktikalıq ilajlar kúsheytilmekte.

Usı jıldıń 18-aprelinen 18-mayına shekem elimizde «Sharwashılıqta sanitariyalıq-epidemiologiyalıq gigiena» aylıǵı járiyalanǵan. Usı aylıq sheńberinde Qaraqalpaqstan Respublikası Veterinariya hám sharwashılıqtı rawajlandırıw komitetiniń qala hám rayonlardaǵı bólimleri tárepinen keń kólemli profilaktikalıq ilajlar ámelge asırılmaqta.

Atap aytqanda, úy haywanların qutırıw keselligine qarsı hám sharwa malların «awsıl» keselligine qarsı shanshıw jumısları alıp barılmaqta. Ilajlar aldınnan tastıyıqlanǵan grafik tiykarında shólkemlestirilip, hár bir aymaqtaǵı xojalıqlar hám sharwashılıq subektlerin tolıq qamtıp alıwǵa ayrıqsha itibar qaratılmaqta.

Sonıń menen birge, sharwa malları saqlanatuǵın orınlarda sanitariyalıq jaǵdaydı jaqsılaw maqsetinde turaqlı túrde dezinfekciya jumısları da alıp barılmaqta. Bul processler kesellik qozdırıwshı faktorlardı saplastırıw, juqpalı kesellikler tarqalıwınıń aldın alıw hám sharwa malları ushın salamat ortalıq jaratıwda úlken áhmiyetke iye bolmaqta.

Qánigeler tárepinen shanshıw hám dezinfekciya processleri zamanagóy veterinariya talapları, sanitariyalıq-gigienalıq normalar hám qáwipsizlik qaǵıydalarına qatań ámel etken halda ámelge asırılmaqta. Bul bolsa haywanlar arasında juqpalı kesellikler tarqalıwınıń aldın alıw, epizootiyalıq turaqlılıqtı támiyinlew menen birge, xalıqtıń salamatlıǵın hám azıq-awqat qáwipsizligin bekkemlewge xızmet etpekte.

Bul aylıq sheńberinde ámelge asırılıp atırǵan ilajlar sharwashılıq tarawın bunnan bılay da rawajlandırıw, tarawda turaqlılıqtı támiyinlew jáne xalıqtıń sapalı hám qáwipsiz azıq-awqat ónimlerine bolǵan talabın qanaatlandırıwda úlken áhmiyetke iye.