Kegeyli rayonında arnawlı-taktikalıq oqıw shınıǵıwı ótkerildi.

Kegeyli rayonında “Adamlar hám haywanlar arasında qutırıw keselliginiń tarqalıwınıń aldın alıwda AJMtB xızmetleriniń birgeliktegi háreketleri” atamasında arnawlı-taktikalıq oqıw shınıǵıwı shólkemlestirildi.

Bul oqıw shınıǵıwında rayonlıq AJMtB xızmetkerleri, veterinariya hám sanitariyalıq-epidemiologiyalıq xızmetlerdiń wákilleri belsene qatnastı. Shınıǵıw dawamında qutırıw keselligi anıqlanǵan sharayatta tiyisli xızmetlerdiń óz-ara birgeliktegi operativ háreketleri, aymaqtı qadaǵalawǵa alıw, kesellik oshaǵın saplastırıw hám xalıqtıń qáwipsizligin támiyinlew boyınsha ámeliy ilajlar sınaqtan ótkerildi.

Sonday-aq, juwapker shólkemlerdiń ayrıqsha jaǵdaylarda háreketleniw tártibi, kúsh hám qurallardı durıs baǵdarlaw, málimleme almasıwdı nátiyjeli shólkemlestiriw máselelerine ayrıqsha itibar qaratıldı.

Oqıw shınıǵıwınıń juwmaǵında xızmetler arasındaǵı birgeliktegi operativ háreketlerdiń nátiyjeliligi bahalanıp, bar kemshiliklerdi saplastırıw hám keleshekte bunday jaǵdaylardıń aldın alıw boyınsha tiyisli usınıslar berildi.

Bul ilaj xalıqtıń sanitariyalıq-epidemiologiyalıq tınıshlıǵın támiyinlew, adamlar hám haywanlar arasında qutırıw keselliginiń tarqalıwınıń aldın alıwda úlken áhmiyetke iye.