Sharwashılıqtı rawajlandırıw máseleleri dodalandı

Usı jıldıń 12-fevral kúni Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komiteti baslıǵı A.Jumanazarov basshılıǵında Qaraqalpaqstan Respublikasında sharwashılıqtı rawajlandırıwda ámelge asırılıp atırǵan jumıslar, mashqalalar hám olardıń sheshimleri boyınsha sáwbetlesiw shólkemlestirildi.

Onda  aymaqta sharwashılıq tarawın bunnan bılay da jetilistiriw, ilimiy kózqaraslardı ámeliyatqa keńnen engiziw, násilshilik jumısların nátiyjeli shólkemlestiriw, ot-jem bazasın bekkemlew hám zamanagóy biotexnologiyalıq usıllardı qollanıw máseleleri hár tárepleme dodalandı.

A.Jumanazarov óziniń shıǵıp sóylegen sózinde búgingi kúnde sharwashılıq tarmaǵın rawajlandırıw ekonomikalıq turaqlılıq hám azıq-awqat qáwipsizligin támiyinlewde áhmiyetli orın iyeleytuǵının ayrıqsha atap ótti.

Sóylesiw procesinde ilimiy izertlew nátiyjelerin óndiris penen integraciyalaw, aymaqlıq mashqalalardı mánzilli úyreniw, jas qánigelerdi ámeliy joybarlarǵa tartıw hám innovaciyalıq texnologiyalardı keńnen engiziw boyınsha anıq usınıslar alǵa qoyıldı.

Májilis juwmaǵında ámelge asırılıwı zárúr bolǵan tiykarǵı wazıypalar belgilep alındı.