Sırt elden násilli sharwa malların alıp keliw máseleleri boyınsha baspasóz konferenciyası bolıp ótti.

Násilli sharwa malların sırt elden alıp keliw tártibi boyınsha baspasóz konferenciyası bolıp ótti. Ilajda Qaraqalpaqstan Respublikası Veterinariya hám sharwashılıqtı rawajlandırıw komitetiniń orınbasarı, sonday-aq, haywanlardıń alıp kiriliwin qadaǵalawǵa juwapker bólim baslıqları qatnastı.

Baspasóz konferenciyasında násilli sharwa malların alıp kiriw boyınsha jańa tártiptiń áhmiyetli tárepleri dodalandı. Jańa ózgerisler sawdaǵa shıǵıp atırǵan haywanlardıń salamatlıǵın jaqsılaw hám jergilikli mallardıń qáwipsizligin támiyinlewge qaratılǵan.

Baspasóz konferenciyasınıń tiykarǵı máseleleri:

• • Qatnasıwshılar veterinariya sertifikatı hám basqa da zárúr hújjetlerge qoyılatuǵın jańalanǵan talaplardı dodaladı. Bul haywanlar arasında kesellik tarqalıw qáwpin sezilerli dárejede azaytadı;
  • Juwapker bólim baslıqları shegaradaǵı qadaǵalaw tártipleri, ilajları, sonıń ishinde, shegaradaǵı májbúriy veterinariyalıq tekseriwler hám laboratoriyalıq tekseriwler haqqında  túsinikler berildi. Bul ilajlar haywanlardıń densawlıǵın saqlaw hám júz beriwi múmkin bolǵan epidemiyalardıń aldın alıwǵa qaratılǵan;
  • Xalıqaralıq sherikler menen birge islesiw: Jergilikli sharwashılıqtıń básekige shıdamlılıǵın arttırıwǵa járdem beretuǵın tájiriybe hám texnologiyalar almasıw ushın sırt mámleketler menen birge islesiw imkaniyatları dodalandı.

Baspasóz konferenciyasınıń juwmaǵında qatnasıwshılar fermerler hám awıl xojalıǵı ónimlerin jetistiriwshiler ushın sharayatlardı jaqsılaw boyınsha áhmiyetli mashqalalar hám usınıslar boyınsha sorawlarına juwaplar aldı.

Jańa imkaniyatlar mámleketimizde tek ǵana sharwa násiliniń sapasın jaqsılawǵa emes, al azıq-awqat qáwipsizligin támiyinlewde oǵada áhmiyetli bolǵan sharwashılıqtıń rawajlanıwına da járdem beredi.