Jasalma urıqlandırıw hám násilshilikti rawajlandırıw boyınsha ashıq sáwbet bolıp ótti.

Búgingi kúnde sharwashılıq tarmaǵın jedel rawajlandırıw arqalı xalqımızdı arzan sapalı gósh, sút hám basqada azıq-awqatlıq ónimleri menen támiyinlew, ásirese awıllıq jerlerde jasap atırǵan puqaralardıń bántligin arttırıw hám daramatların kóbeytiw imkaniyatları jaratılmaqta.

 Búgin “Jasalma urıqlandırıw hám násilshilikti rawajlandırıw ” atamasında ashıq sáwbet bolıp ótti.

Ilajda Qaraqalpaqstan Respublikası Veterinariya hám sharwashılıqtı rawajlandırıw komiteti baslıǵınıń birinshi orınbasarı Q.Pirnazarov,  sharwashılıq tarawı qánigeleri, hám fermerler qatnastı.

Ashıq sáwbet texnik osemenatorlardıń professionallıǵın asırıw hám jasalma urıqlandırıwdıń zamanagóy usılların en jaydırıw maqsetinde shólkemlestirilip, qatnasıwshılar sharwa mallarınıń ónimdarlıǵın hám salamatlıǵın jaqsılawǵa xızmet etetuǵın genetika tarawındaǵı eń jańa texnologiyalardı dodaladı.

Ilaj dawamında ekspertler násil tańlaw boyınsha ámeliy usınısları menen bólisip, sharwashılıqta joqarı nátiyjelerge erisiw ushın jasalma urıqlandırıwǵa ayrıqsha itibar qaratıw áhmiyetli ekenligin dodaladı.

“Jańa texnologiyalardı ámeliyatta nátiyjeli qollanıwı ushın sharwashılıq tarawındaǵı qánigelerdiń bilim hám kónlikpelerin arttırıwǵa háreket etip atırmız,” – dep atap ótti Q.Pirnazarov.