«Ózbekstanda gósh ónimlerin arzanlastırıwda Turkiya modelin qollaw nátiyje beredi» — ekspert Abdumalik Nomozov

 Ózbekstanda sharwa haywanların baǵıwdan paydalı nátiyje alıwda Turkiya modeli qol keledi. Bul haqqında Veterinariya hám sharwashılıqtı rawajlandırıw mámleketlik komiteti BMSh Azıq-awqat hám awıl xojalıǵı shólkeminiń Ózbekstandaǵı wákilxanası menen birgelikte ótkerilgen «Sharwashılıqtı turaqlı rawajlandırıwdı strategiyalıq joybarlaw» temasında regionlıq konferenciyada milliy ekspert Abdumalik Nomozov «Dáryo»ǵa xabarladı.

 BMSh Azıq-awqat hám awıl xojalıǵı shólkeminiń Agrar siyasat máseleleri boyınsha milliy eksperti Abdumalik Nomozovtıń ayraqsha  atap ótiwinshe, eki túrdegi mámlekettiń tájiriybelerdin úyreniw hám olardı Ózbekstanda qollaw boyınsha jumıslar alıp barılmaqta.

 «Biz tájiriybelerdi úyreniwshi bolǵan mámleketlerdi eki túrli tipke ajıratıw múmkin. Birinshisi, Arqa Evropa mámleketleri, yaǵnıy bazar ekonomikası talay rawajlanǵan mámleketler. Ekinshi tiptegi  mámleketliklerge bolsa, áyne biziń mámleketimiz sıyaqlı burınǵı sovet mámleketleri kiredi. Birinshi túrdegi mámleketlerden bazar ekonomikası principlerin sáykeslestiriwdi  úyrenip atırǵan bolsaq, ekinshi tiptegi mámleketlerden ǵárezsizlikke eriskennen keyin qaysı modellerden paydalanǵanın kórip shıǵılıp atır», — dedi Abdumalik Nomozov.

 Eksperttiń aytıwına qaraǵanda, úyrenilgen mámleketler ishinde Ózbekstannıń házirgi sharayatında Turkiya modelin qollaw kóbirek tuwrı keledi.

 «Sebebi ıqlımı, sharayatı, geografiyalıq jaylasıwı bizge talay uyqas. Atap aytqanda, olarda da jer resursları birqansha sheklengen, qurǵaqlıq zonaları kóp. Sol sebepli Turkiya modelin Ózbekstanda qollanıw  ańsat hám paydalı boladı. Bul azıq bazasın tuwrı qáliplestiriwde de, sharwa malların baǵıwda da, gósh ónimleri bahasın normallastırıwda da paydalı nátiyje beredi», — dedi alım Abdumalik Nomozov.