Taqıyatas rayonında sharwa malları arasında keselliklerdiń aldın alıwǵa qaratılǵan kórgizbeli seminar ótkerildi.

Taqıyatas rayonı Naymankól APJ aymaǵında jaylasqan «Ashirbay ata» sharwashılıq fermer xojalıǵında rayon hákimi, veterinariya bólimi hám sharwashılıq fermer xojalıqları menen birgelikte kórgizbeli seminar shólkemlestirildi. Bunday ilajlar usı jıldıń 18-aprel sánesinen 18-may sánesine shekem  Respublikalıq kólemde ótkeriliwi belgilengen, onda tiykarǵı itibar sharwa malları arasında infekciyalıq hám invaziyalıq keselliklerdiń aldın alıw, sonday-aq, fermer xojalıqlarında sanitariyalıq-gigienalıq talaplarǵa qatań ámel etiw máselelerine qaratıladı.

Seminar dawamında taraw qánigeleri tárepinen sharwa malların baǵıwda tazalıqtı támiyinlew, ferma aymaqlarında dezinfekciya jumısların turaqlı shólkemlestiriw, keselliklerdi erte anıqlaw hám profilaktikalıq ilajlardı óz waqtında ámelge asırıw boyınsha ámeliy túsinikler berildi. Sonday-aq, qatnasıwshılarǵa infekciyalıq hám invaziyalıq keselliklerdiń aldın alıwda veterinariya xızmetleri menen tıǵız birge islesiw, belgilengen talaplarǵa ámel etiw áhmiyetli ekenligi ayrıqsha atap ótildi. Ilaj sońında fermerler tárepinen berilgen sorawlarǵa qánigeler tárepinen juwaplar hám ámeliy usınıslar berildi. Bunday ilajlar aymaqlarda sharwashılıq tarawında epizootiyalıq turaqlılıqtı támiyinlew, xalıqtıń salamatlıǵın qorǵaw hám sapalı azıq-awqat ónimlerin jetistiriwde úlken áhmiyetke iye.