Húrmetli fermerler, diyqan xojalıqlarınıń basshıları hám sharwalar!

Usı jıldıń 18-aprel sánesinen 18-may sánesine shekem elimizde “Sharwashılıqta sanitariya-epidemiya-gigiena” aylıǵı járiyalanǵanın málim etemiz.

Búgingi kúnde dúnyada ekologiyalıq turaqlılıq hám klimat ózgeriwi nátiyjesinde sharwa haywanları arasında túrli jańa kesellikler júzege kelmekte. Atap aytqanda, sırt mámleketlerde sharwa malları arasında Awsıl (yashur) keselliginiń tarqalıw qáwpi keńeymekte.

Jáhán haywanlar salamatlıǵı shólkeminiń maǵlıwmatına bola, 2025-2026-jıllarda 48 mámlekette usı keselliktiń jańa “SAT” tipleri dizimge alınǵan bolıp, ámelde qollanılıp atırǵan vakcinalar bul tiplerge qarsı tolıq qorǵamaydı. Sol sebepli keselliktiń tarqalıwınıń aldın alıwda barlıq fermer hám sharwalar belsene qatnasıwı oǵada áhmiyetli bolıp esaplanadı. Usı múnásibet penen, xojalıq hám fermalarda veterinariya-sanitariya tártiplerine qatań ámel etiw, kiriw orınlarında dezinfekciya quralların shólkemlestiriw, biytanıs shaxslar hám transport qurallarınıń kiriwin sheklew, haywanlardı saqlawda zoogigienalıq talaplarǵa ámel etiw, olardı sapalı azıq-awqat hám taza suw menen támiyinlew, aymaqta turaqlı tazalıqtı saqlaw hám zıyanlı haywanlarǵa qarsı gúresiw zárúr.

Eger haywanlarda kesellikke gúman tuwılsa, olardı dárhal basqa haywanlardan ajıratıw, veterinar kelgenge shekem izolyaciyalaw hám hesh qanday dári-dármaqlardı óz betinshe qollanbaw talap etiledi.

Awsıl keselligi belgileri – joqarı temperatura, awız boslıǵında hám tuyaqlarda jaralar, jelinde jaraqatlar baqlanǵanda, tezlik penen veterinariya shıpakerine xabarlasıw shárt. Bunday jaǵdaylarda imaratlardı dezinfekciyalaw, haywan ónimlerin aymaqtan sırtqa shıǵarmaw hám sútti qaynatpastan paydalanbaw kerek.

Sharwa malların óz waqtında shanshıw keselliktiń aldın alıwda eń nátiyjeli ilaj esaplanadı. Iri shaqlı qaramallar jılına eki ret (báhár hám gúzde), qoy hám eshkiler  jılına bir ret shanshılıwı zárúr. Zárúr jaǵdaylarda 2,5-3 aydan úlken barlıq haywanlar májbúriy shanshıladı hám shanshıwdan soń 15-21 kún ishinde immunitet qáliplesedi.

Hár qanday kesellik belgileri baqlanǵanda (61 224 06 36) nomerleri arqalı qánigelerge xabarlasıwıńızdı soraymız.

Húrmetli fermerler hám sharwalar!

Sharwa malları salamatlıǵın saqlawda tazalıq hám veterinariya qaǵıydalarına ámel etiw eń áhmiyetli faktor. Tazalıq – joqarı ónimdarlıq, salamat sharwa hám turaqlı dáramat girewi. Usı aylıq sheńberinde barlıq profilaktikalıq hám epizootiyalıq ilajlardı shólkemleskenlik penen ámelge asırıwıńızdı soraymız.