Nókis rayonında jańa kárxana iske túsirildi

Ózbekstan Respublikası Ǵárezsizligiń 34 jıllıǵı qarsańında “Taqırkól” awıl puqaralar jıyını aymaǵında “BEKMURAD NUKUS TR” juwapkershiligi sheklengen jámiyetiniń jańadan ot-jem (granula) islep shıǵarıw kárxanası iske túsirildi.

Ashılıw saltanatına Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Qaraqalpaqstan Respublikası prokurorı Sh.Aminov, rayon hákimi Z.Zaytov, Qaraqalpaqstan Respublikası Veterinariya hám sharwashılıqtı rawajlandırıw komiteti baslıǵı orınbasarı B.Qurbaniyazov  hám keń jámiyetshilik wákilleri qatnastı.

Ulıwma bahası 600 mıń AQSh dollorı bolǵan kárxanaǵa sırt elden 480 mıń AQSh dolları bolǵan, jońıshqanı qayta islew arqalı sharwa malları ushın ot-jem (granula) tayarlaytuǵın zamanagóy ásbap-úskeneler alıp kelindi. Sonıń menen birge kárxanada laboratoriya shólkemlestirilip, onda Franciya mámleketinen islep shıǵarılǵan ónimniń sapasın anıqlawda úlken áhmiyetke iye «Spectra star» atlı ásbap-úskene alıp kelindi.

Bul joybar iske túsiriliwi arqalı sharwa malları ushın saatına 2 tonnaǵa shekem sapalı hám toyımlı azıqlıq ónimin islep shıǵarıw imkaniyatı jaratılıp, tek ǵana jergilikli sharwashılıq tarmaǵın ot-jem menen támiyinlew ǵana emes, al eksport potencialın arttırıwda da áhmiyetli qádem boladı.

Kárxana óz ónimlerin ishki bazardan tısqarı talap joqarı bolǵan mámleketlerge, sonıń ishinde, Qıtay Xalıq Respublikası hám Birlesken Arab Ámirliklerine eksport etiwdi rejelestirgen. Bul bolsa sırtqı bazarlarǵa shıǵıw, valyuta túsimin arttırıw hám jańa jumıs orınların jaratıwda úlken áhmiyetke iye bolıp, rayonnıń ekonomikalıq potencialın arttırıwǵa xızmet etedi.