HAYWANLARDÍ IDENTIFIKACIYА ETIW TÁRTIBI HAQQÍNDA BILESIZBE? (SORAW-JUWAP)

Haywanlardı identifikaciya etiw ózi ne?

Birkalaw, tamǵalaw, jetonlaw hám chip ornatıw arqalı haywanlarǵa individual nomer beriw, haywanlar haqqında maǵlıwmatlardı elektron málimleme sistemasına kiritiw hám olarǵa veterinariya pasportın rásmiylestiriw (http://lex.uz/docs/3359038) esaplanadı.

Veterinariya pasportı ne?

Veterinariya pasportı – bul haywannıń identifikaciya nomeri, onıń iyesi, haywanlardıń keselliklerge qarsı emlengenligi, emlew jumısları haqqındaǵı maǵlıwmatlar dizimge alıp barılatuǵın hújjet.

Identifikaciya etiw tártibi qanday?

Haywan iyeleri haywan tuwılǵannan soń turaqlı jasaw ornındaǵı veterinariya xızmetiniń wákiline tómendegi múddetlerde múrájat etiwi lazım:

• qaramal, qoy hám eshkiler, túyelerdiń botaları 14 kúnnen keyin;
• taylar hám gúrreler 4 aylıǵınan keyin;
• shoshqa torayları 1 aylıǵınan;
• iyt hám pıshıqlar 3 aylıǵınan keyin.
• 

Identifikaciya ushın haywanlardı veterinariya bólimlerine alıp barıw kerek pe?

Shárt emes. Veterinariya xızmeti wákiliniń ózi arza kelip túskennen soń 3 kún ishinde ornına barıp haywanlardı identifikaciya etedi. Haywan iyesiniń qálewine kóre, iyt hám pıshıqlar ıqtıyariy ráwishte veterinariya bólimlerine alıp barılıwı múmkin.

Haywanlardı identifikaciya etiw shártpe?

Awa shárt. Usı shártti orınlamaw veterinariya, veterinariya-sanitariya qaǵıydaları hám normaların buzıw esaplanadı hám tiyisli juwapkershilikke alıp keledi.

Identifikaciya etilgen haywanlar satılsa yamasa sawǵa etilse ne boladı?

Haywandı satıp alǵan adam turaqlı jasaw ornındaǵı veterinariya xızmeti arqalı 7 kún ishinde haywandı esapka (propiska) qoydıradı. Bul jaǵdayda haywan jańadan identifikaciya qılınbaydı yamasa jańa pasport berilmeydi. Eski pasportqa tiysli maǵlıwmatlar kiritiledi hám juwapker xızmetker tárepinen tastıyqlanadı.

Qaraqalpaqstan Respublikası Veterinariya hám sharwashılıqtı rawajlandırıw komiteti Málimleme xızmeti.