Sharwashılıq tarawında oqıw seminarı bolıp ótti

Búgin paytaxtımız Nókis qalasında ATB Agrobank imaratında sharwashılıq tarawında isbilermenlik penen shuǵıllanıp atırǵan fermerlerge arnalǵan oqıw seminarı óz juwmaǵına jetti.

Ózbekstan Respublikası Prezidentiniń 2022-jıl 8-fevraldaǵı PQ-120-sanlı qararınıń 2-qosımshasınıń 21-bánti hám 2022-jıl 16-fevral kúngi keńeytirilgen tárizde ótkerilgen videoselektor jıynalısındaǵı               15-sanlı bayanatınıń 17-bántiniń orınlanıwın támiyinlew maqsetinde, Jipekshilik hám jún sanaatın rawajlandırıw komiteti, ATB Agrobank kommerciyalıq banki hám de Komitet penen birgelikte, 2022-jıldıń 30-mayınan  28-iyun sánesi aralıǵında fermer xojalıqları basshıları ushın, bárshe wálayatlar hám Qaraqalpaqstan Respublikasında oqıw seminarların shólkemlestiriw boyınsha keste hám baǵdarlama islep shıǵılǵan edi.

Belgilengen keste hám baǵdarlama tiykarında Qaraqalpaqstan Respublikasında  shólkemlestirilgen oqıw seminarında Qaraqalpaqstan Respublikası “Sharwanásil” orayı  hám Qaraqalpaqstan Respublikası Veterinariya hám sharwashılıqtı rawajlandırıw komitetiniń tiyisli qánigeleri, sonday-aq sharwashılıq tarawında jumıs alıp barıp atırǵan barlıq rayonlardaǵı fermer xojalıqları basshıları hám student jaslar qatnastı.

Usı jıldıń 1-2-iyun  kúnleri dawamında ótkerilgen  oqıw seminarı Tashkent qalasınan hám Samarqand wálayatınan kelgen tájiriybeli professor oqıtıwshıları tárepinen alıp barıldı. Oqıw seminarı dawamında professor oqıtıwshılar tárepinen sharwashılıq tarawın bunnan bılayda rawajlandırıw, sonday-aq shańaraqlarda gósh hám sút ushın baǵılatuǵın násilli qaramallardı kóbeytiw hám jasalma tuqımlandırıwdı keń kólemde alıp barıw arqalı jergilikli ónimdarlıǵı tómen bolǵan mallardıń bas sanın basqıshpa-basqısh kemeyttiriwdiń abzallıqları hám ekonomikalıq nátiyjesi haqqında xalıqtıń ámeliy kónlikpelerin asırıw is-ilájların kóriw boyınsha ózleriniǹ bilim hám tájiriybelerin bólisti, seminar qatnasıwshıları tárepinen pikir hám usınıslar bildirildi hám de ózlerin qızıqtırǵan sorawlarǵa juwaplar aldı.

Sonday-aq, shólkemlestiriwshiler tárepinen oqıw seminarına belsene qatnasqan fermer xojalıqları basshıları, student jaslar hám de ayırım basqa xızmet tarawı wákillerine «sertifikat» hám de sawǵalar tapsırıldı.